Rodrigo Cuevas en Onda Roces
El programa Al Altu la Lleva, d’Onda Roces, punxo’l ramu a la temporada con un convidáu d’esceición: Rodrigo Cuevas.
Nuna entrevista en llinia, fecha por Álvaro Martínez, Alexandru Nicodín y Nicolás Muriel, baxo la coordinación de la profesora de Llingua Asturiana Laura Iglesia, l’artista compartió la so visión sobro la cultura, la mocedá y la sociedá d’anguaño. Na técnica y na producción Luis Llano coordinador de Onda Roces
Cuevas desplicó’l procesu creativu del so últimu trabayu, Manual de belleza que completa una triloxía entamada con Manual de cortejo y Manual de romería, y qu’amuesa una evolución escontra una propuesta más personal y d’autor.
Tamién animó a la mocedá a relativizar les redes sociales, defendió la oficialidá del asturianu y destacó la importancia de la música como ferramienta de normalización llingüística, animando a la xente a falar la llingua ensin complexos.
Como referente del colectivu LGTBQ+, amosó la so preocupación pol repunte de discursos que cuestionen derechos yá conquistaos y unvió un mensaxe de sofitu a quien ta construyendo la so identidá: «Nun vais perder a cuasi naide por ser quien sois».
El programa dedicó tamién un espaciu al llibru de Pilar Sánchez Vicente con prólogu de Rodrigo, «La Asturianita», figura a la que l’IES Roces rinde homenaxe con una de les sos aules.
La entrevista remató con una ronda d’entrugues rápides nes que Rodrigo amosó la so faceta más personal, confesándose amante de la tortiella con cebolla, el pote, les lenteyueles y la música de Franco Battiato.
